08-25 – KVK TA TRECE EMPRESARIONAN HUNTO NA BUSINESS MIXER NA SAN NICOLAS
Oranjestad –Diahuebs anochi, 6 di november, Camara di Comercio (KvK) a tene un business mixer na Rum Reef na San Nicolas pa trece startups, empresarionan existente y profesionalnan hunto pa un anochi di networking y asina conecta y colabora cu otro.
E evento di networking a brinda oportunidad pa empresarionan nobo intercambia idea, informacion y posibilidad pa partnership cu empresario estableci di varios sector, y mas cu claro explora manera pa sigi stimula y fortalece e comunidad empresarial na Aruba.
KvK su meta cu e business mixer aki ta pa yuda e startup expande nan network y crea relacion y conexion significante cu esun cu ya a experencia e retonan di establecimento y maneho di un negoshi.
Esnan presente por a disfruta di un ambiente placentero cu bunita bista riba e area di San Nicolas. Presidente di directiva, Sr. Diederik Kemmerling a comparti algun palabra señalando e importancia di networking y conecta cu otro den e mundo di negoshi.
Siguientemente a pasa palabra pa Frits de Palm, cu a comparti su experencia y con e la converti un idea den un negoshi exitoso y algun tips valioso di aspectonan cu mester tene na cuenta.
KvK ta gradici tur cu tabata presente y a contribui na un anochi positivo y na e team di Rum Reef pa nan hospitalidad.
KvK lo sigi organisa eventonan di networking similar dunando espacio na mas empresario pa forma parti di e actividad aki, den cuadro di e meta pa sostene crecemento y exito di empresario local.
Aruba, 7 november 2025
Camara di Comercio y Industria (KvK)