03-26 Aruba Chamber Business Event 2026: “Beyond Tourism: Building Aruba’s Next Economy”

Oranjestad - Casi 300 empresario, representante di gobierno, profesional y otro stakeholders a reuni durante e Aruba Chamber Business Event 2026, cu a tuma luga diasabra ultimo den e ballroom di The St. Regis Aruba Resort. E punto di salida tabata e reto fundamental cu Aruba ta enfrenta: con nos por sigui crea prosperidad sin perde e cualidadnan cu a haci nos isla unico?

Cu e tema “Beyond Tourism: Building Aruba’s Next Economy – From Volume to Value. From Dependence to Diversification”, e evento a habri dialogo y a enfoca riba con Aruba por aumenta e balor cu turismo ta crea, protegiendo calidad di bida, naturaleza y su caracter unico. Den su palabra di apertura, Presidente di Directiva di KvK, Diederik Kemmerling, a enfatisa cu Aruba a yega na un punto decisivo. Turismo a contribui enormemente na prosperidad di Aruba, pero e siguiente paso ta exigi decisionnan dificil y un vision comparti tocante e desaroyo di nos economia.

E dos oradornan, tabata Tony van Veen, empresario cu a crece na Aruba y actualmente ta CEO di DIY Media Group na Merca y Miles Mercera, CEO di CINEX Curaçao. Segun e oradornan, Aruba a logra un exito extraordinario danki na turismo, pero precisamente e mesun exito awor ta un presion creciente riba infrastructura, trafico, naturaleza, vivienda y mas importante ainda, riba e experiencia unico cu residente y bishitante semper a asocia cu Aruba. A referi na cambio di crecemiento basa principalmente riba cantidad di bishitantenan, pa un modelo cu ta pone enfasis riba calidad, sostenibilidad y balor agrega.  Aruba tin e oportunidad pa usa e exito di turismo como motor pa construi un economia mas resiliente y menos dependiente di un solo sector.

E recomendacionan di e oradornan tabata un maneho cu mas control di crecemiento turistico, limita turismo di crucero na un maximo di un barco pa dia, reconsidera permiso pa hotelnan nobo y revisa proyectonan aproba cu ainda no a inicia construccion, registra, regula y limita e expansion di short-term rentals manera Airbnb. Alabes, pa proteha e producto turistico mes, a propone introduci un Environmental Impact Tax pa actividadnan cu tin un impacto negativo riba naturaleza y espacio publico, siguiendo e principio cu esun cu causa daño tambe contribui na e costo di proteccion.  Riba e tema di vivienda, a propone un sistema di transfer tax di dos nivel, cu un tarifa mas favorable pa residente y famianan local, mientras cu comprador no-residente y inversionistanan comercial lo contribui cu un tarifa mas halto. E meta mester ta mantene vivienda mas accesibel pa local. Crea un Aruba Future Fund, unda un porcentahe fiho di impuesto relaciona cu turismo lo wordo reserva automaticamente pa inverti den diversificacion economico, vivienda y entrepeneurship local. Tambe a enfatisa e importancia di inverti den fintech, economia digital y e industria creativo y cultural, simplifica e proseso pa cuminsa un negoshi, amplia acceso na micro-financiamento y incorpora alfabetisacion financiero, digital y inteligencia artificial den sistema educativo. Exito economico no mester wordo midi exclusivamente cu crecimiento di GDP, sino tambe cu indicadornan cu refleha bienestar, calidad di bida y oportunidadnan pa e comunidad. Tambe a pone enfasis riba colaboracion structural entre Aruba, Bonaire y Curaçao pa fortalece competitividad regional.

Como entretenimiento e artista local, Elvis Tromp, a ilustra en bibo riba un canvas e Aruba di awe y un tranformacion y diversificacion di nos economia. E hoben Phillip-Johnson Martinus, studiante y alabes Minister Hubenil di Cultura di Parlamento Hubenil a duna splicacion riba e pintura via un poema. 

Panelistanan tabata Omar-Steve Lejuez (Privada Stays), Vincent van Rutten (Sentoo) y Humphrey “Fito” Croes (Cas Bon Group) y Gavril Mansur a fungi como moderado y maestro di ceremonia. Cada un di e panelistanan a aporta un perspectiva practico for di nan propio sector. Den e conversacion a sali claramente cu e transicion pa un modelo economico mas sostenibel no ta un responsabilidad exclusivo di gobierno, sino tambe di sector priva. A enfoca riba construccion di vivienda pa famianan local, cual ta un inversion den stabilidad economico y social di Aruba. Tambe por considera modelonan internacional unda desaroyadornan di hotel tambe ta comparti responsabilidad pa e impacto cu desaroyo turistico tin riba mercado di vivienda. E derecho pa desaroya proyectonan grandi tambe por bin acompaña cu cierto responsabilidad social.  Den cualkier regulacion futuro di short-term rentals mester haci un distincion cla entre e propietario local cu ta genera un ingreso adicional y e operadornan comercial cu ta maneha hopi propiedadnan. 

Aunke diferente opinion a wordo comparti, tabatin un consenso amplio cu Aruba a yega na un momento decisivo, unda turismo, vivienda, infrastructura, sostenibilidad y calidad di bida no por wordo considera como tema separa, sino como parti di e vision pa futuro.

KvK ta gradici tur oradornan, panelistanan, moderador/MC, demas participante, e patrocinador principal CMB y e co-padrocinadornan Aruba Tourism Authority, AFAS Software, Aruba Airport Authority, Setar y Ennia. 

Cu e evento aki, Camara di Comercio y Industria ta desea di stimula e dialogo riba e futuro di turismo y e siguiente fase di desaroyo economico di Aruba. E evento a toca un tema importante pa Aruba y KvK ta expresa su deseo pa continua facilitando e dialogo aki den colaboracion cu sector priva, gobierno y comunidad.

Aruba, 29 juni 2026

Camara di Comercio y Industria (KvK)