02-26 – Camara di Comercio a organisa un Business Mixer exitoso cu un concepto di “Business Speed Dating”
Oranjestad - Diahuebs, 7 di mei ultimo, Camara di Comercio y Industria (KvK) a organisa un Business Mixer exitoso, unda tanto empresario nobo como algun cu hopi experencia a bin hunto pa un anochi enfoca riba networking, intercambio di conocemento y conexionnan empresarial.
E aspecto principal di e evento tabata e introduccion di un concepto di “Business Speed Dating”, un forma structura di networking crea pa stimula participantenan pa conecta cu otro empresario den un ambiente interactivo bou di guia di Sra. Charisse Hoen. Durante varios conversacionnan cortico, participantenan a haya oportunidad pa presenta nan mes, intercambia ideanan, explora posibel colaboracionnan y amplia nan red profesional di un manera eficiente y accesibel.
Varios topico a bin dilanti cu ta refleha e realidad diario di empresarionan na Aruba, p.e. e retonan di logistica, e proceso pa obtene permisonan necesario, e desafionan pa adkeri y mantene personal cualifica, cumplimento cu obligacionnan fiscal y cu regulacionnan y e relacion cu cliente. Locual cu tambe a wordo remarca ta e desafio cu tanto comerciantenan nobo como experencia ta confronta den nan crecemento cual ta e habilidad y necesidad pa por delega. E Business Mixer a crea un plataforma valioso unda emprendedornan nobo por a haya insight, guia y consehonan practico di miembronan mas experencia di comunidad empresarial, entre otro algun miembro di directiva di KvK y otro empresarionan. Na mes momento, e grupo aki a haya oportunidad pa conoce negoshinan nobo, perspectivanan fresco y posiblel oportunidadnan di colaboracion den futuro.
Pa KvK mes, e evento tabata no solamente un oportunidad pa networking pero tambe un momento valioso pa scucha directamente for di e empresarionan nan necesidadnan concreto pa asina sigui ofrece training, curso y apoyo riba e temanan corespondiente. KvK ta sigui enfatisa riba e importancia di networking y colaboracion dentro di e ecosistema empresarial local. Door di crea espacionan unda empresarionan por conecta y siña di otro, KvK ta fortalece e comunidad empresarial y contribui na crecemento y innovacion continuo di negoshinan na Aruba.
Camara di Comercio ta mira bek cu satisfaccion riba un anochi exitoso y dinamico y ta gradici tur participante pa nan presencia y entusiasmo.
Aruba, 8 di mei 2026
Camara di Comercio y Industria (KvK)