01-26 – KVK TA ANUNCIA DIRECTIVA PA AÑA 2026

KvK ta anuncia directiva pa aña 2026:
A ELIGI PRESIDENTE Y VICE-PRESIDENTE DI DIRECTIVA DI KVK

Oranjestad - Conforme e stipulacion den ley, Camara di Comercio y Industria (KvK) ta representa comercio y industria di Aruba. E directiva di KvK, cu ta consisti di 9 miembro, ta wordo eligi door di representantenan di negoshinan grandi "grootbedrijf" como tambe di negoshinan chikito "kleinbedrijf". Den e prome reunion di directiva di KvK, e miembronan ta eligi un presidente y un vice-presidente pa e aña actual. Alabes ta keda determina cual miembro lo fungi como e presidente suplente. E presidente y vice-presidente, huntu cu e secretario/director ehecutivo, ta forma e directiva diario di KvK.

Pa aña 2026, e miembronan di directiva a re-eligi sr. Diederik Kemmerling como presidente y sr. Robert Croes como vice-presidente. Demas miembronan di directiva di KvK ta sra. Monica Kock, sr. Gavril Mansur, sr. Derrell Maxwell, sr. Devaney (Dave) Martinus, sra. Nathalie Moore, sra. Roxanne Solognier-van Dinter y sr. Omar Tromp cu lo fungi tambe como presidente suplente den caso cu e presidente of e vice-presidente ta ausente.

E directiva di KvK ta encarga cu e maneho y strategia di e organisacion, cu asistencia di e secretario/director ehecutivo, sr. Martijn Balkestein, kende alabes huntu cu e personal di KvK ta percura pa e funcionamento y actividadnan diario di KvK.

Rol di Camara di Comercio
KvK no ta solamente responsabel pa registro di negoshi, pero ta actua tambe como representante y defensor di e comunidad comercial. Como conector importante entre sector priva y Gobierno, KvK ta stimula entrepreneurship, ta duna sosten na negoshinan chikito y mediano (SME's), ta promove innovacion y ta contribui na desaroyo di fuerza laboral. Ademas, e organisacion ta comparti informacion economico importante, ta duna guiamento na negoshinan y ta ofrece diferente forma di training pa empresarionan.

Logronan Destacable di 2025
Durante aña 2025, KvK a logra fortifica cooperacion cu Gobierno riba temanan economico clave manera mercado laboral, reforma di impuesto, digitalisacion, costonan di opera negoshi y diversificacion economico. Un mision comercial na Panama a crea oportunidad pa negoshinan local pa explora posibilidadnan internacional. E programa di training a ser renoba completamente cu temanan nobo y actual, incluyendo inteligencia artificial y skilnan digital, pa asina prepara empresarionan pa e futuro digital.
E business mixers tradicional a ser rediseña pa bira eventonan di networking efectivo unda empresarionan por haci conexion valioso. Pa por compronde miho e necesidadnan di empresarionan, KvK a lansa cuater encuesta comercial durante e aña. Comitenan specialisa a ser estableci pa atende asuntonan specifico di diferente sector, incluyendo un comite pa Real Estate & Vacation Rentals y un pa Economia Informal. Durante 2025, KvK a celebra su aniversario di 95 aña, un milestone importante den servicio na comunidad comercial di Aruba.
 

Mehoracionnan Digital
Den liña cu e ambicionnan nacional di eGovernment, KvK a implementa varios mehoracion digital. Un identidad corporativo nobo a ser introduci pa refleha miho e vision moderno di e organisacion. E website di KvK a wordo rediseña completamente y e plataforma My Chamber ta den proceso pa wordo mehora significativamente pa ofrece un miho experiencia di usuario y acceso mas facil na servicionan. E esfuersonan di digitalisacion aki ta den alinea completo cu e ambicionnan nacional pa un Gobierno digital.

KvK den 2026
E directiva ta consisti di empresarionan cu tin Aruba y e sectornan comercial na pecho y cu den nomber di sector priva ta traha duro pa mantene bon comunicacion cu sector publico. Directiva di KvK ta dispuesto pa sigui duna su aporte y lo keda boga pa tin mas dialogo entre Gobierno y e sector priva pa asina conhuntamente por atende e diferente puntonan di atencion y di preocupacion di e sector comercial. KvK lo sigui promove innovacion y misionnan comercial pa crea mas posibilidad pa negoshinan local. Alabes, KvK lo sigui organisa diferente actividadnan, forum, mixers y workshops y training pa nos empresarionan riba topiconan moderno y actual pa prepara e negoshi pa futuro y lo comparti informacion y experticio.

Aruba, 15 di januari 2026
Camara di Comercio y Industria (KvK)