Connect to Us RSS

14-2011 - Registracion di empresa, jan-juni 2011

Oranjestad – Registracion di empresa nobo na Registro Comercial di Camara di Comercio y Industria te cu luna di juni 2011 ta mustra un descenso leve den e promer seis luna di 2010 pa loque ta e total di empresa nobo inscribi. Aña pasa a registra un total di 584 empresa nobo “onshore” entre januari y juni, mientras cu e aña aki 574 empresa a keda registra den e mesun periodo. Tin algun diferencia clave den e cifranan general aki. Por nota cu e cantidad di “eenmanszaak’ a baha levemente (368 na 2010 y 364 na 2011), igualmente e cantidad di NV a disminui (175 na 2010 y 163 na 2011). Banda di esaki por nota un aumento significante di e cantidad di VBA, un forma nobo di empresa introduci na 2009 cu te awor no tabata conta cu interes pa banda di empresario, tal vez causa pa e hecho cu e forma aki no ta tanto conoci ainda. Den promer seis luna di 2011 a registra 31 VBA, loque ta mas cu a registra durante henter 2010, cu tabata 18.

Mientras cu en general e cifranan aki pa promer mitar di 2011 no ta indica un crecimiento economico ainda, ta conoci cu otro indicador manera entrada di loonbelasting, invoerrechten y BBO pa e mesun periodo segun publicacion di Banco Central sí ta indica un avance. Un splicacion pa e diferencia aki por ta cu e actividad genera pa e companianan cu tabata existi caba ta creciendo y esaki ta refleha den cifra mas halto pa entrada di gobierno. En todo caso por señala un mehoracion compara cu aña 2009, unda a registra den mesun periodo solamente 444 empresa onshore.

Desaroyo internacional
Rumbo di economia di Aruba pa resto di 2011 lo bay depende grandemente di economia internacional y specificamente di e situacion na Estadonan Uni, unda desempleo ta keda halto y ta parce cu e recuperacion economico ta bay na un ritmo mas lento cu loke a pensa anteriormente. Tambe e debenan publico grandi ta duna preocupacion pa posicion di dollar den economia global. Esaki por tin consecuencia pa turismo na Aruba, cu te awor ta conta cu un recuperacion leve compara cu aña pasa.

Economia global ta depende tambe di e desaroyonan di prijs di petroleo, cu den e promer parti di 2011 a conoce un aumento grandi. E temor general ta cu prijs halto di crudo, y por lo tanto di tur producto deriva di petroleo, lo por bay afecta recuperacion global economico. Den e caso aki esaki lo por afecta tambe turismo mundial, especialmente e destinacionnan na distancia largo cu ta sinti efecto di aumento di gasto di transporte aereo. Pa Aruba esaki por tin consecuencia pa mercado europeo, por ehemplo. Tambe e situacion na Europa ta depende di ki rumbo e problemanan financiero den Union Europeo tuma, no solamente pa cu Grecia, sino tambe pa otro país manera Portugal, Italia y Spaña. Un caída di valor di Euro compara cu dollar por trese efecto negativo tambe pa e turista europeo cu ta desea di biaha pa Aruba.

Alimentacion
Otro motibo di preocupacion ta desaroyo di prijs di alimento riba mercado mundial. Durante 2010 y e promer parti di 2011 a tuma lugar un aumento fuerte di diferente alimento basico,influencia pa prijs halto di crudo. E hecho cu Aruba ta importa practicamente tur su alimentacion lo trese cune cu aki tambe lo sinti e consecuencia di esaki den e prijsnan local pa alimentacion.
Riba e inflacion importa mester tene cuenta tambe cu inflacion genera localmente, bao influencia di prijs mas halto di awa, coriente y transporte local. Den edicion di juni 2011 di e revista di KvK (Chamber News & Views ta aparece un articulo extenso riba e problematica mundial di alimentacion. Interesadonan por haye riba website di KvK: www.arubachamber.com/downloads/newsletters

Aruba, 12 di juli 2011
Camara di Comercio y Industria (KvK)

ANEXO di Comunicado di Prensa no. 14 - 2011

 

 

 

By orbitalnets.com