Connect to Us LinkedIn Youtube RSS

08-2019 - KvK cu un recordatorio pa comunidad comercial y pueblo en general TE CU DIA 15 DI FEBRUARI POR TUMA NOTA Y DUNA COMENTARIO ENCUANTO E ROP
  • PDF
  • Print
  • Email
Oranjestad – Camara di Comercio y Industria (KvK) kier informa cu te cu dia 15 di februari tin e posibilidad di tuma nota di e Plan Preparatorio di Desaroyo Espacial 2019, pues e Ruimtelijke Ontwikkelingsplan (ROP) 2019. E ta importante pa henter e comunidad ta na altura di e plan aki y kico e ta encera. Gobierno kier finalisa e ROP e aña aki y e ta bay ta un plan cu su efectividad pa e siguiente decada.
 
Kico ta ROP y dicon e ta importante
Un ROP ta contene e vision di gobierno over con lo desaroya e areanan di Aruba. E ta duna forma na e beleid pa desaroyo espacial. Un ROP ta wordo componi door di e Minister concerni y tin un duracion di 10 aña. Unabes cu e ROP wordo formalisa lo mester continua cu desaroya e ROPv cu ta describi e parti huridico na cua tur hende mester cumpli cune. Mester remarca cu e ROP anterior cu a keda formalisa na 2009 no a logra yega na e punto pa formalisa un ROPv y ta spera cu esaki lo por bira un realidad e biaha aki. Pa yega na e ROP 2019 a tene re cu diferente stakeholders y a haci encuestanan pa colecta informacion pa duna contenido valido na e ROP. Pa e ROP nobo a tene cuenta cu e metanan di SDG pa asina contribui tambe na e continuidad y durabilidad di por ehempel naturalesa y crea areanan sostenibel creando balanse economico y social. E cualidadnan y balornan cu ta representa Aruba ta central pa e ROP 2019.
 
Zonanan segun e ROP
E aspecto mas importante di e ROP ta e particion den zonanan. Di e forma aki ta aloca areanan destina pa vivienda, comercio, turismo y naturalesa por ehempel. Cada zona ta visibel riba e mapa y ta bay cu un descripcion encuanto kico ta e rekisitonan y con lo bay wordo desaroya den su infrastructura manera e ROP ta indica. Pa haya un bista di esaki gobierno ta ofrece e oportunidad pa tuma nota di e contenido di e ROP 2019. Por tuma nota di e Plan Preparatorio pa Desaroyo Espacial 2019 (cROP 2019), e splicacion di e Plan Preparatorio pa Desaroyo Espacial 2019 y mapa di e plan por medio di https://aruba-ro.nl. Desde 15 di januari te cu 15 di februari tin e oportunidad pa haci esaki tambe door di bishita oficina di Direccion di  Infrastructura en Planificacion (DIP), den sala di lesamento di tur MFA y tur filial di Biblioteca nacional Aruba. Por haya tur e documentonan tambe online via website di DIP www.dip.aw. 
 
Bo opinion ta importante y tambe ta conta!
KvK ta urgi comunidad pa informa riba e ROP 2019 y duna bo opinion. Gobierno kier ricibi mas hopi comentario cu ta posibel pa asina formalisa un ROP cu ta conforme cu deseo di comunidad en general. Pa entrega bo opinion, vision of sugerencia riba e ROP mester corda cu e mester tin bon argumento. Tur hende por entrega esaki por escrito y dirigi esaki na:
Ministerio di Desaroyo Espacial, Infrastructura y Medio Ambiente
Sr. Otmar Oduber, B. Sc.
Mediante Sr. dr. Rigoberto H. Croes
Sabana Blanco 68
Alhier
 
Tur carta lo wordo contesta por escrito door di e Minister. Si a caso bo persona tin pregunta encuanto e contenido di e ROP 2019 of su procedura, tuma contacto cu DIP na 527-7100, 527-7182, 527-7154, 527-7181. KvK tambe lo bay analisa y duna su opinion riba e ROP pa asina e proceso ta uno husto y transparente.
 
Aruba, 7 di februari 2019
Camara di Comercio y Industria (KvK)
 
 

By orbitalnets.com