Connect to Us LinkedIn Youtube RSS

32-2018 - Cu e fin di sondea posibilidadnan comercial den nos region: KVK TA TENE UN EXITOSO SESION INFORMATIVO TOCANTE COMERCIO CU SURINAM
  • PDF
  • Print
  • Email
Oranjestad – Cu e fin di crea mas laso comercial Camara di Comercio y Industria Aruba (KvK) conhuntamente cu e organisacion Internationaal Ambitieus a organisa e evento ‘Zakendoen met Suriname’ pa asina brinda mas atencion y crusa e fronteranan comercial entre Aruba y Surinam.
 
E evento aki a tuma luga den auditorio di KvK riba 26 di september ultimo cu un agenda hopi extenso. Sra. Sonja Velthuizen, Directora di KvK a inicia e programa sigui pa Presidente di Directiva di KvK, Sr. Ernst Mohamed cu a duna e invitadonan un caluroso bonbini y a bisa algun palabra. Sr. Pascal Fredrik tabata e moderador di e evento y a introduci tur e oradornan cu a elabora riba topiconan interesante encuanto haci negoshi cu Surinam.
 
Sra. Sharon Meijer di Exprodesk a splica encuanto e importancia di exportacion pa economia di Aruba. Tambe Sra Meijer a trece dilanti productonan di Surinam cu por wordo considera como un otro alternativa di importacion di productonan manera fruta y berdura. Siguientemente Sr. Silvino Seymor kende cu hunto cu Sr. Fredrik ta cofundador di Internationaal Ambitieus a elabora riba caracteristicanan di e mercado y desaroyonan economico di Surinam. Por ultimo Sr. Ruud Souverein di Candied Fruits Suriname a informa e publico presente encuanto e oportunidad di un mision comercial cu Surinam ta brinda. E moderador a clausura e anochi cu un sesion di pregunta y contesta y despues a brinda oportunidad pa tur esnan presente amplia y elabora nan relacionnan comercial.
 
E mision comercial cu lo tuma luga dia 13 pa 15 di november proximo lo conta cu participacion di companianan di Boneiro, Corsou y Hulanda y ya caba tin varios empresario cu a mustra nan interes y a registra pa asina confirma nan presencia. E mision aki ta un bon oportunidad, principalmente pa sector di turismo y di agricultura. E den Reino Hulandes ta yuda crea mas posibilidadnan comercial. E mision comercial ta combina cu un congreso di 2 dia y tin oportunidad pa conoce di cerca otro negoshinan pa crea partnership. Otro puntonan di e programa ta un excursion cultural y bishita na negoshinan di Surinam. KvK ta invita tur comerciante local cu kier expande y forma parti di e mision comercial pa Surinam pa registra via e website di Internationaal Ambitieus: http://internationaalambitieus.com y forma parti di un tremendo oportunidad comercial.  
 
Aruba, 28 september 2018
Camara di Comercio y Industria (KvK)
 
   
 

By orbitalnets.com