Connect to Us LinkedIn Youtube RSS

03-2018 - Miembronan nobo di Directiva di kvK ta sostene metanan di KvK pa 2018
  • PDF
  • Print
  • Email
Oranjestad – Nos ta cuminsando un aña nobo y Camara di Comercio y Industria di Aruba (KvK) ta continua cu su empeño y contribui na engrandece comercio y e sector economico di Aruba. 2018 lo bin cu hopi reto y oportunidadnan nobo y KvK ta prepara pa saca lo maximo pa bienestar di comercio. KvK tampoco a para keto y ta den pleno implementacion di un sistema di registro nobo cu lo bay facilita e trabou y di e forma aki por bay brinda miho servicio na su clientenan. Esaki ta forma parti di e metanan di KvK pa 2018.
 
Directiva nobo
Recientemente a elegi algun miembro nobo di Directiva di KvK. Di e forma aki ta yama bon bini na sra. Wanda Broeksema, sra. Alexlindy Croes y sr. Satish Daryanani, kendenan sigur lo sa di brinda nan conocemento y experticio y duna respaldo na e plan strategico di Directiva di KvK. Sr. Ernst J. E. Mohamed a keda re-eligi como presidente di Directiva y Sr. Kawish Misier como Vice-Presidente di Directiva.
 
White Paper
Un punto di e plan strategico di directiva di KvK ta consisti di crea un Whitepaper den cua ta trece aspectonan cu ta importante pa soluciona a corto plazo. E documento final a wordo otorga na Gobernador di Aruba y tambe na Su Excelencia Prome Minister di Aruba y asina brindando conseho cu lo yuda diferente sector comercial na Aruba. E documento a ser compila a base di informacion cu frecuentemente ta yega na atencion di KvK di parti di e empresario. Topiconan cu ta resalta den e documento aki ta dependencia di turismo, educacion y con esaki ta match cu sector laboral, Citgo y su impacto, e influencia y oportunidadnan di e-commerce, con pa baha of evita gastonan halto ora di haci negoshi,  rebiba caya principal, e importancia di un ROPv, agricultura, maneho di desperdicio y energia limpi di polucion. E puntonan a wordo discuti y Prome Minister a indica di ta hopi contento cu e contribucion di parti di KvK pa yuda na un miho situacion pa comerciantenan na Aruba. E White Paper ta forma asina aki e punto di salida riba cua KvK ta considera ta aspectonan cu mester haya debido atencion mas lihe cu ta posibel. Di e forma aki kier logra crea y probecha di oportunidadnan comercial y elimina e red tape pa cuminsa y maneha un negoshi. E White Paper lo wordo revisa cada tempo pa asina tene cuenta cu desaroyonan tumando luga.
 
Pa cualkier pregunta y/of mas informacion, por tuma contacto cu KvK via e-mail na This e-mail address is being protected from spambots. You need JavaScript enabled to view it of via telefoon 582-1120. 
 
 
Aruba, 15 di januari 2018
Camara di Comercio y Industria (KvK)
 

By orbitalnets.com