Connect to Us LinkedIn Youtube RSS

05-2017 - Evento di KvK: Business Plaza - Step Forward! a ofrece hopi informacion valioso!
  • PDF
  • Print
  • Email
Oranjestad – Pa di cinco aña consecutivo Camara di Comercio y Industria Aruba (KvK) a organisa e evento anual Business Plaza-Step Forward! Riba diasabra 14 di januari ultimo esaki a tuma luga caminda hopi comerciante a atende e diferente charlanan y a haya oportunidadnan unico pa ricibi conseho pa nan negoshi. E patrocinado principal di e evento aki tabata Aruba Yellow Pages.
 
E meta di Business Plaza - Step Forward! ta pa brinda informacion y guia na e empresario cu ta desea di expande su liña di producto of servicionan y cu talbes kier restructura su negoshi of tin intencion pa expande cu mercado internacional. 
 
Presidente di Camara di Comercio, Sr. Ernst Mohamed a inicia e programa den e auditorio caminda a hiba palabra na tur esnan presente y alabes informa nan encuanto e meta di KvK pa 2017 cu ta hiba e titulo “Trece empresario, gobierno y comunidad hunto”. 
 
Business Plaza - Step Forward! por a conta cu un panel di oradornan cu temanan interesante y varia: Sr. Rasheed Girvan di Aruba Yellow Pages a duna un charla encuanto “Success drivers for effective digital marketing”. Sra. Lisette Malmberg di De Palm Corporation a duna un charla inspirativo encuanto negoshi di famia y con su existencia ta evoluciona. Sr. Herbert Diaz di SQS Consultancy & Research a splica encuanto sales forecasting y con bo por saca beneficionan for di esaki. Sr. Stefan Oosterwaal a conta mas over di Arubits y kico ta Bitcoin. Sr. Ryan Kock di Atlas Accountancy a duna un charla interesante encuanto con paga bo impuesto por ta algo agradabel. Despues di un pauze cortico e parti atardi a continua cu Sr. Edwin Jacobs di SVb cu a conta over ‘Wellness @ Work’, sigui pa Sra. Malyce Meelis-Koolman cu a conta su experiencia den e charla Healthy Eating @ Work den colaboracion cu Alfresco Aruba. Y pa culmina e panel Sra. Shameeza van Loon a duna e ultimo charla encuanto e importancia di awa. Den otro sala nos propio Directora, Sra. Sonja Velthuizen hunto cu Sra. Jacqueline (Wina) Holmond-Montsanto, Hefe di Registro di KvK a ofrece un workshop informativo cu tin como titulo “Rekisitonan pa registra como un director di entidadnan legal”.
 
Manera ta custumber, a brinda e oportunidad pa papia cu un consehero di KvK tocante bo situacion specifico y haya contesta di biaha riba bo preguntanan. Notario Johnson tabata presente pa duna consulta priva na interesadonan. Tambe un representante di Departamento di Asunto Economico cu a brinda informacion encuanto diferente permisonan pa establece un negoshi.
 
Den luna di juli proximo lo organisa e otro evento cu ta Business Plaza-Get Started! dirigi na e persona cu kier cuminsa un negoshi. Keda pendiente pa mas informacion tocante e evento aki! Pa mas informacion tocante edicionnan di Business Plaza y otro eventonan di KvK, por tuma contacto cu Business Information & Support na 582-1566 of manda un e-mail pa: This e-mail address is being protected from spambots. You need JavaScript enabled to view it .  
 
 
Aruba, 17 januari 2017
Camara di Comercio y Industria (KvK)
alt alt altaltalt
 

By orbitalnets.com