INVERSION DEN DESAROYO                                                

EQUILIBRA Y SOSTENIBEL                                                                          

Puntonan di salida pa un programa di                                                    

gobernacion pa e periodo 2005-2009.

 

                                                                                   

Introduccion

 

Tin indicacionnan di un creciente consciencia den nos comunidad pa cu desaroyo sostenibel y duradero. E caracter, identidad, norma y valornan, medio ambiente etc. di nos isla conhuntamente ta factornan determinante pa e perspectiva di nos futuro bienestar. Mantencion, adaptacion y evolucion di cualkier di e factornan aki mester por conta cu sosten di e comunidad Arubano.

 

Camara di Comercio y Industria Aruba (KvK) ta identifica e 4 issue (vraagstukken) como esunnan mas importante den actualidad, pa motivo di nan caracter nacional y nan impacto inmediato riba e rumbo di desaroyo di nos isla. Ta trata di:

§                Nos Isla, Nos Futuro

§                Desaroyo Economico Balanza

§                Calidad di Gobernacion

§                Relacion sostenibel: Aruba-Reino/Union Europeo

 

Durante e proximo periodo di gobernacion e issuenan aki mester ta e prome enfoke di nos gobernantenan. Den e nota aki lo trata cada uno y lo elabora riba algun aspecto esencial pa tuma den consideracion. Recomendacionnan y sugerencianan treci dilanti no ta pretende di ta completo o exhaustivo, sino ta basa riba e prioridadnan relevante pa e gremio comercial/empresarial.

 

Historia economico di Aruba ta mustra cu repetidamente cu un situacion di crisis tabata e pre-ambulo pa un nos isla scoge un rumbo economico nobo y dominante. Ehempel ta e sectornan minero di fosfaat, despues di oro, refineria di Lago y turismo. Durante e ultimo 18 aña e actual pilar economico mas grandi, esta e sector turistico-recreativo, e conoce un crecemiento estable cu a contribui na progreso di nos comunidad. Un pregunta logico ta “Kiko ta e perspectivanan pa e siguiente 15 aña?”, esta riba termino medio y largo, mas aya di un periodo di gobernacion. En realidad colectividad, esta cada cuidadano, cada gremio y cada politico lo mester puntra su mes “unda nos kier bay ?”. Aruba ta asercando atrobe un crisis, esta uno di erosion di nos calidad di bida. Awor ta e momento pa para keto y analiza serca nos mes con nos por inverti den nos porvenir y progreso mientras ta salvaguardia locual nos hendenan – igual cu e turista moderno – ta considera como asunto(nan) indispensable y no-substituibel. Awor mester determina e strategia a termino largo con ta bay inverti pa logra un sociedad duradero.

 

Aruba mester continua den su intento pa desaroya un modelo di “partnership social” entre gobierno y gremionan comercial y sindical. E partnership aki lo sirbi como mecanismo di consulta, colaboracion, participacion y negociacion pa asuntonan di interes nacional cu impacto riba desaroyo sostenibel. Un bon relacion y comunicacion lo engrandece e resultadonan di e esfuerzonan individual y colectivo di tur e actornan.

I. Nos Isla, Nos Futuro

 

1.1   Capacidad di carga

 

Poblacion ta afecta e rumbo di desaroyo economico nacional y vice versa manera e caso di Aruba e ultimo 15 aña. Nos poblacion a crece exponencial a base di e influho di trahadornan stranhero rekeri dor di un crecemento acelera den sector turistico. Actualmente 1/3 parti di e poblacion ta consisti di migrante y e influho  ainda ta fuerte. Trahadornan stranhero mayoritariamente ta opta pa establece permanente na nos isla considerando e situacion economico - menos favorabel compara cu Aruba - den cuenca di Caribe, e region di procedencia di un gran parti di imigrante. Un parti ya a adkeri derecho di nacionalidad hulandes. E cantidad di habitante di Aruba oficial  ta 98.500[1] persona, y ta representa un densidad di 536 persona pa km2. Prognosticacion di CBS – asumiendo continuacion di e actual tasa di crecemento economico - ta indica cu pa aña 2023 e cantidad di migrante lo suma 69.000 persona, surpasando 50% di e poblacion total (estima na 143.000 habitante). E imigracion aki lo sigui pone presion riba e capacidad di carga di un sin fin di tereno (p.e. enseñanza, medio ambiente, vivienda, cultura). Ora e cantidad di persona ta surpasa e recursonan rekeri pa cada persona sobrevivi por hasta papia di sobrepoblacion (capacidad di carga).

 

Economia basa riba imigracion

Tur parti di mundo imigracion ta un issue controversial y hopi pais conoce restriccion pa cu imigracion. Comunmente esaki ta worde hustifica pa motivonan economico, es decir influho di trahador di menos recurso lo pone e nivel di salario y e calidad di bida baha. Algun pais ta limita imigracion pa motivonan cultural.

 

Argumentonan - scucha internacionalmente como na Aruba pa encurasha sentimentonan anti-imigracion - ta cu e imigrante ta:

a.           isola su mes den cierto barionan y ta rechaza pa siña e idioma local;

b.           “horta” empleo di personanan local (trahando pa sueldonan hopi mas abao);

c.           atacha e sentido di harmonia den comunidad y propia identidad;

d.           aumenta e consumpcion di recursonan scars (p.e. enseñanza, cuido medico)

 

E realidad di awe sinembargo ta dicta cu no por tolera efectonan negativo di e presencia di un comunidad imigrante basta substancial. No ta suficiente pa atrae e trahador di exterior, pero mester tuma un postura mas pro-activo pa juda e imigrante pa integra mihor den mercado laboral y e comunidad arubano. Pa nos futuro di Aruba - igual cu pasado – lo por sirbi como importante punto di ventaha e cohesion di su sociedad.

 

Na caminda pa un stabilizacion di imigracion y forza laboral

KvK ta propone pa desaroya un masterplan pa un imigracion responsabel y sostenibel acopla na un maneho corespondiente.

E masterplan lo consisti di dos programa di accion simultaneo, esta

§                un programa pa stimula activamente e aceptacion y integracion di e imigrante. Esaki lo crea condicionnan favorabel pa imigrantenan contribui plenamente na e desaroyo sostenibel di Aruba.

Esaki por ensera:

-          campaña nacional di informacion y conscientizacion;

-          cursonan pa imigrante di idioma, historia y cultura arubano;

§                un programa (alianza gobierno-sector priva) pa optimaliza e sincronizacion  di demanda y oferta laboral cu e meta pa hisa e participacion laboral di nos residentenan. Algun accion pa tuma den consideracion ta:

-          campaña di informacion;

-          programa di asistencia pa identifica vacatura y traha solicitud;

-          programa di (re)capacitacion (workplace skills development) ;

-          crea condicionnan atractivo/favorabel pa ingreso den mercado laboral (p.e. incentivonan fiscal pa 60+ y personanan handicap, stimulacion di empleo parttime den empresa, flexibilizacion di oranan di trabao y/o escolar, regula y stimula sector di cuido di mucha, incentivonan fiscal pa mayornan pa uzo di facilidadnan pa cuido di mucha);

-          introduccion di contratonan di labor (arbeidscontractanten) pa sector priva;

-          desaroyo di  e “uitzendsector” pa medio di leynan cu ta regula mediacion di trabao (conforme ley di Curaçao).

Tur esaki lo rekeri un “commitment” a largo plaza y ta sugeri pa pone fondonan publico disponibel (p.e. di programa di Fondo di Desaroyo Arubano FDA) pa su ehecucion.

 

 

1.2  Maneho di admision

 

En general ta constata un falta di maneho cu ta balanza e diferente interesnan adecuadamente y na menor costo (material y imaterial) pa nos comunidad, tanto awor como den futuro. Analisando e circumstancianan actual e solucion mester worde busca den un maneho di admision cu ta encurasha en prome instancia e influho di trahador stranhero cu e siguiente perfil: joven, soltero, productivo, sano y bon educa. Na mes momento lo tin cu incorpora den e maneho aki condicionnan normativo cu lo aporta na facilita y acorta e proceso di integracion den comunidad arubano di e (trahador) stranhero. 

 

KvK ta urgi pa reforma e maneho di admision y di naturalisacion.

Algun recomendacionnan pa considera ta:

a.           simplifica y acorta e proceduranan pa permiso pa trahador stranhero y (re)capacita e empleadonan publico encarga;

b.           otorga permiso pa un periodo di 3 aña (excluyendo posibilidad di cambio di dunador di trabao sin permiso y di “gezinshereniging”);

c.           prolongacion pa otro 3 aña despues di un screening estricto incluyendo prueba di integracion (p.e. dominio di idioma Papiamento);

d.           introduci un sistema pa stimula un reparticion balanza entre e paisnan di procedencia cual lo aporta na diversidad di idioma, cultura y conocemento;

e.           moratorio pa cierto edad (riba di 30 aña – relaciona cu e disbalanze den e piramide di nos poblacion y e iminente fenomeno di “vergrijzing”);

f.             ofrece servicionan di informacion y mediacion pa trahador den paisnan preferencial;

g.           introduci simultaneamente un moratorio pa 3 aña riba permisonan di trabao nobo;

h.           entrada liber di personanan cu nacionalidad Hulandes (rijksgenoten).

Den cuadro di nos relacion estatal cu e otro partnernan den Reino Hulandes ta recomendabel pa reciproca y/o reconoce e derecho di “libertad di movecion” di personanan cu nacionalidad Hulandes.

i.             procedura acelera y exencion (vrijstelling) di restriccionnan pa “trahador di conocimento” (kenniswerker). Adicionalmente por otorga e pareha di e trahador di conocimento automaticamente exencion pa labora na Aruba. Criterianan pa cualifica como “trahador di conocimento” mester worde defini a base di prioridadnan macro-economico, p.e. cierto funcion, nivel salarial, nivel educacional y/o campo di experticio).

Prolongacion di permiso pa un periodo di 3 of mas aña por worde acopla na e exigencia pa traspaso di conocimento (sistema di counterpart local).

Sectornan cu por beneficia di un tipo di areglo aki ta e.o. e sectornan di servicionan financiero, petro-quimico, enseñanza, technologia di informacion y comunicación (ICT), y otro sectornan impulsa pa tecnologia.

j.              naturalisacion despues di 10 aña di residencia legal;

k.           revisa e Ordenanza di Admision y Expulsion (p.e. pa duna basis legal na moratorio pa permisonan di trabao)

l.              introduci un “wachttijd” pa adkeri derechonan/beneficionan a base di casamento cu un persona local (pa combati matrimonio ficticio);

m.         efectua medidanan mas severo pa impone un estricto cumplimento cu e leynan y maneho di admision y imigracion; mas en particular pa ataka imigracion ilegal (boete substancial pa dunador di trabao);

n.           mihora funcionamento di y coordinacion entre e departamentonan Directie Immigratie en Naturalisatie Aruba (DINA) y Direccion di Labor y Investigacion (DLI);

o.           upgrade e servicionan di seccion “arbeidsvoorziening” (antes “job center”) di DLI y e databank di vacaturanan (pa stimula (re)- ingreso den mercado laboral o mobilidad laboral);

p.           formula y implementa un maneho pa integracion/assimilacion activo.

 

II. Desaroyo Economico Balanza

 

2.1          Vision, maneho y ehecucion

 

Un economia manehabel y bon balanza ta un “must” pa logra un desaroyo sostenibel y duradero pa nos pais. Mas importante, sinembargo, ta e formulacion - cu participacion y cooperacion di tur “stakeholders”[2] - di un vision comun y un plan strategico pa e desaroyo economico di Aruba. Teniendo cuenta tambe cu e caracter di nos “open economy”, ta recomenda como prome paso pa institucionaliza un structura di consulta y comunicacion entre e stakeholders. E structura aki lo fungi tambe como foro pa sincroniza necesidadnan y esfuerzonan cu e fin di logra un mihor resultado.

 

Ehecucion di maneho ta rekeri formulacion di un maneho cla y coherente cu disposicion di instrumentonan efectivo (p.e. leynan). Considerando e structura economico actual – en particular e disbalanze entre actividadnan sectoral – KvK ta boga pa gobierno practica te na cierto grado un maneho di “managed economy”, entre otro dirigi riba

-         descurasha actividadnan satura;
-         temporiza crecemento di cierto actividadnan economico (p.e. esunnan cu “labor intensive”) y
-         stimula actividadnan inovativo y no-tradicional (excluyendo loke ta “labor intensive”).
 
Instrumentonan:

1.      clima di inversion: drecha nos posicion competitivo pa establece actividadnan inovativo dor di

a.           fiha incentivonan y criterionan transparente den cuadro di un maneho di diversificacion;

b.           moderniza nos infrastructura fisico y aplica medidanan no fisico pa stimula eficiencia den mobilidad y diversificacion economico. Adelantando riba e estudio(nan) necesario pa un plan di mobilidad KvK ta señala e siguiente proyectonan di urgencia:

-          ringweg 3 (doble via) for di aeropuerto te cu Sasakiweg;

-          autopista (doble via) for di Pos Chiquito te cu aeropuerto (ringweg 3);

-          mehora conexion entre Mahuma y zona industrial di Barcadera;

c.           moderniza nos infrastructura legal pa medio di implementacion di ordenanzanan basico pa:

-          reglementa un competencia empresarial sano (mededingingswet);

E ley aki lo mester stroba practicanan di distorcion di mecanismo di mercado, manera cooperacion horizontal y vertical entre empresanan y concentracion (dominio di mercado). Den un economia habri mester garantiza fair play y promove un mercado (oferta y demanda) cu ta funciona bon y den un forma transparente.

-          combati delictonan economico cu un “wet economische delicten”;

d.           revisa ordenanzanan existente y/o ahusta e maneho/criterionan pa otorgamento di permisonan (p.e. ley di establecimento di negoshi, vergunningsverordening).

2.      planificacion integral: institui cu prioridad un “planbureau central” cu e funcion pa prepara - den un forma independiente - analisis economico di caracter scientifico cu tin relevancia pa formacion di un maneho strategico y coherente. Ta recomenda pa asigna e encargo aki na un seccion dentro di Departamento di Asuntonan Economico y pa e seccion aki mantene lazonan estrecho cu sector priva. Pa medio di nan estudionan e planbureau lo stimula coleccion, produccion, utilizacion y interpretacion di datos y estadisticanan den nos comunidad.

3.      ordenacion espacial: introduccion respectivamente di un ordenanza (Landverordening Ruimtelijke Ordening) y un plan di desaroyo espacial  (ROP) lo duna base na un maneho responsabel y balanza pa cu uzo di espacio/tereno.

En general KvK ta boga pa limita lo mas posible e cantidad di tereno dedica pa finnan comercial, turistico y di vivienda. Sinembargo Gobierno lo por trese incentivo fiscal pa promove construccion di condominio luhoso pa poblacion local cuminsa costuma cu vivienda vertical di calidad halto (p.e. hopi terreno dilanti laman banda di Pos Chiquito, Savaneta etc. ta ideal pa esaki y lo duna impulso economico na e zona di pariba di brug).

4.      promocion pro-activo: institui un organisacion (Trade & Investment Promotion - TIP) cu ta mercadea Aruba como lugar pa inverti y hasi negoshi y fomenta lazonan comercial cu exterior y relacionnan cu blokenan economico. E.o. por crea oportunidadnan pa empresa chikito y mediano y mehora prijsnan di producto den mercado.

Como KvK ya ta desplegando cierto actividadnan di promocion pasivo den exterior y a ofrece Gobierno di Aruba na 2003 pa fungi como TIP pa asina di inmediato Aruba por cuminza presenta su mes den diferente foro.

 

Pa loke ta toca nos desaroyo economico tin 4 area specifico cu ta rekeri mas atencion.

-         Diversificacion economico

-         Consolidacion turistico

-         Desaroyo di region di San Nicolas

-         Fortificacion di empresanan chikito y mediano

 

Diversificacion economico:

Aunke te awor e oportunidadnan identifica ta limita, KvK ta sostene un enfoke riba e siguiente sectornan:

 

-          Servicionan financiero

a.      desaroya productonan nobo y atractivo pa e mercado internacional y implementa leynan nobo pa efectua esakinan;

b.      implementa cu urgencia e Wetboek van Rechtsvordering BRV (pa pone na vigor Boek II NBW cu ta aproba desde 1 januari 2002 y cual lo duna inversionistanan mas seguridad) y e Ordenanza pa Supervision di Trustkantoren.

 

-          Servicionan di distribucion

  1. desaroya un zona liber moderno (industrial, comercial y servicionan), tanto den forma fisico como virtual. Pa e parti fisico e proyecto “Masterplan zona liber” aki ta ensera construccion (den fase) di un compleho full equipa y parcelanan individual cu tur infrastructura cla pa cuminsa actividadnan di exportacion.
  2. crea e posibilidad legal y infrastructural pa companianan di telecomunicacion internacional cu satelite pa internet, datacomunicacion y telefon establece den zona liber (Aruba su posicion geo-centrico en relacion cu e paisnan cu potencia economico Brazil-Argentina-Chile y Merca-Canada-Mexico ta ideal pa esaki);
  3. implementa e proyecto di “Mudanza di e waf di carga di Oranjestad pa Barcadera” pa brinda facilidadnan/servicionan pa transportacion di carga cu ta sirbi tanto mercado local, zona liber Barcadera y aeropuerto Reina Beatrix. Simultaneamente esaki lo soluciona e problemático di acesibilidad y mobilidad dentro y rond di Oranjestad y lo habri oportunidad pa desaroyonan nobo na Oranjestad, especialmente canto di awa (L.G. Smith Blvd.).

 

-          Actividadnan “high tech” o productivo

Cualificacion pa actividadnan complementario y compatibel den nos structura economico ta actividadnan economico cu:

  1. inversion di capital halto (p.e. equiponan high tech);
  2. valor agrega halto;
  3. poco requirimento di mano di obra (“labour extensive”);
  4. poco requirimento di espacio/tereno y/o
  5. potencial di exportacion.

 

-          Servicionan di conocemento (enseñanza, ICT)

  • introduci a corto plazo un ley pa desaroyo di e-commerce y pa proteha contra e maluzo di esaki.
  • ahusta e maneho di mercado laboral: flexibiliza e reglanan di admision[3] pa trahadornan stranhero ora ta trata di personanan cu conocemento specializa/educacion profesional den technologia avanza en combinacion cu cierto sector (p.e. refineria, universidad).

 

Strategia pa consolidacion turistico

Den un mercado mas y mas competitivo y globalisante, Aruba mester tuma un postura activo pa cu e calidad di su infrastructura, un factor clave pa su exito como destinacion turistico. Turismo ta nos pilar economico mas importante y por lo pronto lo mantene e posicion aki. Pa mengua su dependencia y vulnerabilidad y hisa su nivel di sostenibilidad ta propone e.o. pa

a.      re-introduci inmediatamente un moratorio hotelero pa evita e explosion di poblacion (4 trahador pa cada camber manera practica a mustra den pasado y manera e rapport di Sam Cole ta pronostica). Cu e cambernan extra disponibel den periodo 2002-2006 ya caba tin suficiente demanda di turista y trahador migrante pa segura un efecto multiplicador di inversion afilia cu turismo, pa e proximo 5 aña. Pa e diferente proyecto actualmente den planificacion (estima na alrededor di 3.000 camber adicional) ta recomenda pa sea para esakinan, laga e inversionista adkeri y converti incluso upgrade un propiedad existente o  temporiza e construccion di e proyectonan aki;

 

b.      implementa un plan strategico pa un turismo sostenibel cu desaroyo di producto(nan) y/o mercado(nan), especialmente esnan di mas valor agrega;

c.      mas diversificacion di mercado (paisnan y tiponan di turista) en bes di dependencia exclusivo riba esunnan actual;

d.      limita proyectonan y atraccionnan turistico na esnan inovativo, di escala chikito y cu caracter local (p.e. establece un boutique hotel[4] den un edificio historico manera “Cas di Ecury”) cu incentivonan fiscal y subsidio pa restaura monumento;

e.      legaliza aceptacion di valutanan stranhero, esta dollar y euro, a base di e practica actual;

f.        introduci un ordenanza pa clasificacion di hotel pa regla nivelnan di calidad den sector hotelero Den un landsbesluit h.a.m. ta elabora e normanan (conforme standardnan internacionalmente reconoci) pa clasifica e diferente tiponan di acomodacion riba nos isla (incluso e proyectonan di condominio den zona turistico). Ta aconseha pa inclui recompensa fiscal di suma fiho pa upgrading di un hotel.

 

Desaroyo regional

Apesar di existencia di diferente estudio di desaroyo pa San Nicolas y becindario, e region aki ta falta iniciativanan concreto pa su revitalizacion. E plan “The 2004 San Nicolas & Seroe Colorado Development Plan” di Sasaki Associates por forma un basis pa elabora plannan specifico. Nan recomendacion pa proyectonan di “hotel resort” den area di Seroe Colorado ta ambicioso y di un escala cu no ta tene cuenta cu su impacto riba nos capacidad di carga. Pa e region aki tambe KvK ta keda mantene su posicion di moratorio pa hotel. KvK ta urgi pa elabora un pakete di incentivonan y un “stappenplan” detaya pa realisacion di actividadnan economico exclusivamente pa pariba di brug.

 

Fortificacion di empresanan chikito y mediano (SME’s)

Formula plannan di accion cu lo duna sosten y asistencia na SME’s, e.o.

-         programanan di informacion;

-         programa pa fianza (small business loan program) cu seguro di credito;

-         implementacion di un fondo di garantia;

-         programa di subsidio pa estudionan di factibilidad;

-         cursonan di capacitacion di empresarionan.

Ehecucion di e programanan aki por tuma lugar en cooperacion cu otro actornan (p.e. AIB, AMTI y KvK).

 

 

2.2          Mercado Laboral

 

“Human capital” ta un factor di suma importancia den un economia di servicio. Dos aspecto di nos forza laboral ta causa pa preocupacion serio, esta:

 

Productividad

International Monetary Fund (IMF)[5] recientemente a presenta e siguiente scenario:  “according to our calculations, if net immigration is reduced to zero and labor productivity growth remains unchanged, economic growth will drop below ½ percent by 2020 as population aging accelerates.”

Teniendo cuenta cu e hecho cu nos tasa di crecemento di productividad y e nivel di capacitacion di e forza laboral ya caba ta mas abao cu otro paisnan cu un nivel di entrada similar, nos ta opina cu e issue aki merece atencion nacional urgentemente. Ademas mester puntra si crecemento di nos economia a base di influho continuo di trahador stranhero ta keda un opcion viabel riba termina largo. Productividad mester ta sostenibel, es decir mester inverti den mantene y mihor ainda eleve, pa por mantene nos posicion/ventaha competitivo, un bon clima di inversion y e creciente nivel di bida di nos cuidadanonan.

 

Despues di a studia diferente initiativa/proyecto den Caribe[6] cu e meta di eleva e nivel di productividad laboral nos ta propone pa establece un structura institucional tripartite cu e siguiente responsibilidadnan:

a.           riba nivel nacional

-          stimula e dialogo entre e partnernan social

-          desaroya programa(nan) nacional di informacion/conscientizacion tocante productividad

b.           riba nivel di sector (publico y priva)

-          desaroya metodonan pa midi y maneha productividad;

-          desaroya instrumentonan pa aumenta productividad

c.           riba nivel di empresa/organizacion

-          desaroya programanan di capacitacion[7]

 

En vista di su importancia strategico un “Conseho Nacional pa Productividad” lo mester resorta bao di e cartera di Minister-Presidente.

 

Nivel di Enseñanza

Analisis di SER [8] ta constata un “scholingsgraad” di nos hendenan (“human capital”) -en particular di e forza laboral - mucho abao en comparacion cu nos nivel di bida. E nivel aki ta worde atribui na e cantidad di imigrante, mayoria asina jama “unskilled”. Mas halto e grado di enseñanza, mas halto e nivel salarial y mas entrada di belasting. Un halto grado di enseñanza por conduci na desaroyo di actividadnan nobo, manera di “kenniseconomie”.

 

Cu e meta pa eleva e grado di enseñanza di poblacion laboral arubano ta recomenda pa implementa:

-          un programa nacional di (re-)capacitacion;

-          un sistema di credencial (evaluacion y reconocimento) pa experiencia/diplomanan di imigrante (pa stimula eventual continuacion di enseñanza);

-          incentivonan pa empresanan cu ta inverti den capacitacion ICT;

-          un campaña nacional di conscientizacion pa “life long learning”;

-          un maneho na fabor di un mihor conexion entre enseñanza y trabao.

 

Adicionalmente ta señala un urgencia pa moderniza y amplia nos pakete di leynan laboral pa cumpli cu e necesidadnan y realidadnan economico di awendia.

Algun criteria pa tene na cuenta durante e revision ta:

-          simplificacion

-          flexibilidad

-          transparencia

-          eliminacion di ambivalencia

-          uniformidad

-          igualdad di trato

-          proteccion di tur partido

-          concordancia cu tratadonan internacional ratifica

Ta recomenda pa tuma na consideracion pa introduci un ordenanza pa regula circumstancianan na pia di trabao pa asina proteha e trahador contra influencianan cu por menasa su seguridad, salud o bienestar. Supervision riba e cumplimento cu e reglanan aki por keda delega na un seccion (Inspeccion di Labor) bao di DLI.

Reduccion di ausentismo, accidentenan laboral, malesa y otro kehonan relaciona cu trabao lo contribui na un productividad mas halto di e empresa y lo baha e gastonan en cuadro di e Lv. Bedrijfsongevallen, Ziekteverzekering (SVb) y Lv. AZV (AZV- UO).

 

 

2.3          Responsabilidad pa nos sociedad

 

Mas y mas pais ta reconoce cu empresanan tin un responsabilidad civico/social (na ingles: “corporate social responsibility” - CSR). Por papia di  responsabilidad civico/social ora e enfoke di un empresa ta su rol y impacto riba sociedad (“profit, people and planet”).  Den practica decisionnan di e empresa ta worde pisa contra e spectativanan di tur su “stakeholders” cu e meta di crea un valor agrega maximo pa e 3 “bottom lines”: empresa, poblacion y medio ambiente. Tal comportacion responsabel ta rekeri atencion riba nivel di maneho strategico pa asuntonan manera derechonan humano, etica, corporate governance, medio ambiente y seguridad social.

KvK ta propone – den contexto di un “public-private partnership” - pa organiza un foro nacional pa promove responsabilidad social den sector empresarial Arubano y pa prepara un plan di accion. Un participacion mas activo dor di empresanan riba e tereno di CRS lo trece mas ekilibrio entre e stakeholders pa cu e responsabilidad pa calidad di bida di nos comunidad.

 

 

2.4          Seguridad social

 

E reto inmediato riba tereno di seguridad social no ta kon ta mehora e pakete social sino kon ta percura pa continuidad di e pakete di beneficionan social cu nos conoce awendia. Solvabilidad di e fondonan di seguridad social ta depende di na prome instancia di e forza financiero di e contribuyente (dunador di trabao y trahador) y e cantidad di contribuyente versus e beneficionan otorga y e cantidad di beneficiario. Tur esaki tambe mira den contexto di e forza expansivo di nos economia y nos posicion competitivo internacionalmente.

 

Ta recomenda como prioridad un programa di accion pa salvaguardia e diferente fondonan di seguridad social, en particular:

§                algemene ziektekosten verzekering (AZV):

implementa di un pakete basico obligatorio mas sobrio. Esaki ta crea espacio pa oferta di seguro(nan) suplementario a base di mercado liber.

§                pensioen di biehez

hisa den un forma gradual e edad di pension AOV/AWW te na 62 aña y simultaneamente implementa pa ley un areglo obligatorio di pension general suplementario pa tur trahador di sector priva.

Tur fondo di seguridad social mester ta suheto na un maneho di control. Unda ta necesario ta recomenda pa implementa sistemanan di “checks & balances” den suministracion di beneficionan como medidanan di sancion pa frena evasion di e obligacion di e contribuyentenan y abuso di e derecho riba beneficio. Den e cuadro aki ta menciona e necesidad pa moderniza e structura di supervision di Sociale Verzekeringsbank (SVb) di acuerdo cu e principionan di “good governance” , cu participacion di tur partner social cu ta contribui cu cash den e fondo.

III. Calidad di Gobernacion

 

3.1            Fortificacion pa bon gobernacion

 

Calidad di gobernacion, esta trias politica, ta indispensabelmente pa pais Aruba mantene su posicion, reputacion y aceptacion den sociedad di paisnan mundial. Mester continua cu perseverancia e proceso pa mehora calidad y integridad di gobernacion na Aruba conforme e recomendacionnan di Rapport Calidad/Kwaliteit[9].

 

Organo legislativo

Mehoracion di e transparencia pa cu trabao parlamentario lo fortifica su imagen. Miembronan di parlamento por hasi mayor utilizacion di e competencianan y instrumentonan na disposicion di e organo legislativo pa ta bon informa y eleva e calidad di supervision di e organo ehecutivo. Tambe mester re-evalua e sistema di trabao parlamentario pa logra elimina retraso y tardanza riba tereno di tratamento di proyectonan di ley. Parlamento mester hasi mayor uzo - dentro di su structura di operacion - pa fomenta y mantene un dialogo directo cu gremionan representativo di comunidad.

 

Organo ehecutivo

Transparencia di e decisionnan ministerial ta un pre-condicion pa bon gobernacion. Banda di publicacion obligatorio di reglanan di maneho y su cambionan prome cu esaki bay den vigor, decisionnan cu ta desvia di e reglanan aki semper mester ta acompaña pa su argumentonan. Un clima di seguridad huridico ta importante pa e inversionista local y stranhero.

 

Punto di salida di KvK pa un structura ministerial ta:

-          eficiencia y relevancia enfrente e tareanan primordial pa cu comunidad y a base di realisacion di e vision y plan strategico a largo plazo;

-          reduccion di e cantidad di ministerio na siete (7) pa reduci gasto;

-          eliminacion di e facilidad cu tin actualmente pa cambia e reparticion di cartera (Lb. instelling ministeries) cu cada periodo di gobernacion, Esaki ta trece hopi confusion y ta efecta maneho y funcionamento di aparato gubernamental. Criteria pa reparticion mester ta e.o. e “samenhang” entre e terenonan di trabao y un peso di trabao equitativo.

A base di esaki ta sugeri e siguiente combinacion di cartera:

1.      Minister di Asuntonan General, Trafico, Transporte y Telecomunicacion

2.      Minister di Finanzas y Re-structuracion Gubernamental

3.      Minister di Asuntonan Economico y Turismo

4.      Minister di Enseñanza, Cultura y Deporte

5.      Minister di Husticia y Asuntonan Administrativo

6.      Minister di Labor, Seguridad Social y Salubridad Publico

7.      Minister di Infrastructura y Medio Ambiente

 

Organo(nan) consultativo

E organo(nan) consultativo mas halto y mas importante pa pais Aruba, esta Raad van Advies y Algemene Rekenkamer Aruba (ARA), mester por traha optimalmente. Ta recomenda como prioridad pa gobierno

a.           garantiza un funcionamento autonomo y independiente y

b.           percura pa e condicionnan necesario pa e organonan aki por cumpli cabalmente cu nan obligacion (p.e. Gobierno mester tene cuenta pa fiha metanan pa su actividadnan. Sin e metanan aki  estudionan di ARA pa midi e efectividad di utilizacion di recursonan financiero publico ta keda frustra.)

 

Poder hudicial

Continuidad di un funcionamento di calidad di nos poder hudicial ta sumamente valioso pa nos economia y rekeri inversionnan den un bon organisacion y capacitacion di esaki. For di Status Aparte Aruba conoce un cooperacion cu Antiyas Hulandes den forma di un Corte Comun (Corte den prome y di dos instancia). Den vista di e iminente erosion estatal di Antiyas Hulandes e areglo di cooperacion aki lo desintegra. Pa evalua e diferente alternativanan cu lo bin riba mesa KvK ta considera e sigiuente criteria como importante:

-          e garantia di un husticia di calidad

-          e garantia di un husticia independiente y imparcial

-          harmonizacion funcional cu Hulanda (unda ta residencia e Corte supremo di Cassacion).

 

 

3.2            Renobacion di aparato gubernamental

 

E meta general ta un mihor calidad di servicio pa e cuidadano y e gobierno, cu miras pa promove desaroyo sostenibel riba tur campo di servicio publico. Un aparato publico mester tin e capacidad pa atrae, retene, desaroya y motiva trahadornan competente.

Ta recomenda pa implementa un programa di reforma integral pa un sector publico sostenibel cu e obhetivo di evalua y redefini e mision, composicion, funcion y rol di servicionan publico den contexto di e exigencianan y recursonan di awendia. E programa lo mester ensera, e.o:

-          e “kerntakenanalyse” pa re-designa e structuranan y procesonan di servicio publico;

-          revision di maneho di personal;

-          introduccion di un sistema di evaluacion di prestacion y otro garantianan pa e personal (conforme practica den sector priva);

-          capacitacion di personal y liderazgo;

-          automatizacion/inovacion di procesonan di trabao (p.e. Curacao a desaroya algun proyecto di e-government pa entrega di servicionan digital);

-          programanan di accion pa un funcionamento mas eficiente y dirigi riba e cliente.

 

Metanan cu kier logra cu un aparato gubernamental re-structura ta:

a.           reduccion di gasto y mas eficiencia

b.           aumento di productividad

c.           mihor calidad di servicio y mas rapido

d.           mas continuidad, flexibilidad y sostenibilidad di servicio

e.           mihor satisfaccion di e necesidadnan di e cliente (interno y externo)

En conexion cu e metanan aki y como feedback, ta recomenda pa introduci un sistema di comunicacion directo entre aparato gubernamental y comunidad segun e modelo hulandes, esta e instituto central di “ombudsman”. Un ombudsman ta un funcionario independiente y imparcial, unda e cuidadano por deposita su keho – tambe via internet – tocante servicionan publico y pa cual e no ta haya (debido) oido. Kehonan por worde limita na asuntonan individual pa cual e cuidadano no por recuri na hues.  Como intermediario, e ombudsman ta scucha tur dos banda, esta e cuidadania y gobierno.

 

 

3.3            Finanzas Publico

 

Ta logico cu un maneho financiero mester ta suheto na metanan concreto, cla y uniforme. Mas ainda e ta di suma importancia pa e metanan aki ya keda incorpora den e programa di gobernacion di e partido politico cu ta participando na eleccion. Asina ta pone e basis pa tras di un periodo di gobernacion por ”toets” e prestacion y jega na un analisis di e factornan determinante den esaki.

Apesar di diferente initiativa pa maneha e gastonan di Gobierno durante e ultimo ananan no a logra alcanza e meta di un presupuesto balanza. Motivo principal ta cu e gasto di peso mayor, esta di personal. Nos ta recomenda pa implementa un maneho riba tereno di “human resources” cu e siguiente puntonan di atencion:

§   respeta e proceso corecto di nombramento di personal;

§   atene strictamente na e criteria pa aplica e “schalering”

§   ahusta e sistema di pensioen a base di condicionnan cu ta pagabel

§   deshasi di empleadonan cu ta sea “overtollig” o no ta presenta na trabao

§   implementa un programa di upgrading di personal

 
Reforma fiscal

Riba tereno di impuesto KvK ta boga pa

a.           un restructuracion di impuesto directo pa impuesto indirecto;

b.           simplificacion y harmonisacion di tarifanan aplica (b.v. invoerrechten & accijnzen, IB y WB, logeer- y casinobelasting)

En particular mester tuma na consideracion e reduccion di peso fiscal efectivo riba cierto sector economico. Apesar di e consentimiento pa un periodo limita pa aumento di derechonan di importacion y exciso na 2002 (a base di e protocol entre gobierno y e gremionan comercial y sindical den coalicion) e aumentonan aki ainda ta na vigor.

In principio KvK no tin obheccion pa introduci un “sales tax”, basta cu esaki ta worde limita na servicionan brinda. Riba mercancia ya ta aplica derechonan di importacion.

Ehecucion di puntonan a y b ta suheto incondicionalmente na un simplificacion di nos sistema di belasting. Den e caso aki nos ta referi na e recomendacionnan di Comision Timmer, cual lo mester worde ehecuta integralmente.

Finalmente KvK ta sostene e recomendacion di IMF[10] pa implementa un ordenanza pa transparencia y flexibilidad den regimen fiscal, un asina conoci “Fiscal Responsibility Act”, cu lo duna incentivonan pa un maneho fiscal disciplina.

 

 

 

IV. Relacion Sostenibel: Aruba - Reino/Union Europeo

 

4.1           Estudio di tur e opcionnan

 

Na 2002 a surgi e tema fundamental di nos futuro estructura estatal den Reino Hulandes y principalmente cu Union Europeo (EU), tras di e avancenan di integracion di Hulanda den Union Europeo. E relacion aki ta involucra no solamente e destino socio-economico y politico di nos generacion, pero mas ainda e futuro generacionnan di nos pueblo. Nos ta di opinion cu un decision grandi asina mester ser tuma cu e mayor sosten posible.

KvK ta di opinion cu nos isla no por keda distante di e trend mundial di cooperacion entre paisnan y integracion di mercadonan y lo mester refleha con e instrumento strategico aki por sirbi su futuro desaroyo. Ademas pa por participa efectivamente den e proceso di globalizacion ta rekeri pa scoge un modelo di cooperacion/integracion mas apropia na nos interesnan – sea uno di compromisonan limita (p.e. bloke economico-comercial) te na uno comprensivo cu ta inclui mas tereno di cooperacion pa neutraliza cierto imbalanzenan.

 

 

4.2           Referendum

 

KvK ta boga – unaves e Gabinete 2005-2009 ta den funcion – pa sondea e opinion di comunidad encuanto e relacion di Aruba dentro di Reino y cu Union Europeo. E instrumento consultativo di referendum lo duna e gobierno mayor sosten posible pa tuma decision bon motiva. Esaki mester worde presidi pa un proceso di informacion y discusion, cual ta inclui un inventarizacion obhetivo di tur e ventaha y desventaha di tur opcion y tambe e vision cu nos ta desea pa Aruba den futuro.

Nos ta recomenda – analogo na e negociacionnan pa nos status aparte – pa e gobierno involucra tur gremio di comunidad den e preparacion di su posicion pa e negociacionnan riba e tema aki.

 

 

 

 

 

Aruba, juni 2005

Camara di Comercio y Industria Aruba


[1] Centraal Bureau voor de Statistiek (CBS)

 

[2] gobierno, partnernan social y otro organisacionnan no-gubernamental

[3] Nos ta referi na e recomendacionnan bao punto 1.2.

[4] Conforme e recomendacionnan di Sam Cole.

[5] IMF 2005 Article IV Consultation Concluding Statement of the Mission – January 19, 2005

[6] ILO report 2004: “Productivity Improvement through strengthening Management-Labour Cooperation – the Caribbean Experience”.

[7] Cierto programanan lo por worde ehecuta in cooperacion cu otro organisacionnan existente (manera Fundacion Aruba Management & Training Institute).

[8] Rapport “De Scholingsgraad in Aruba” di Sociaal-Economische Raad - maart 2002

[9] Rapport “Calidad” – Arubaanse Werkgroep Deugdelijkheid van Bestuur – oktober 1997

[10] IMF January 19, 2005: Concluding Statement of the Mission ex Article IV Consultation Aruba