CONVENIO VOLUNTARIO

q partidonan politico participante na e e eleccion di 23 di september 2005 (asina jama PARTIDONAN POLITICO) y

q e comision di bon boluntad (asina jama COMISION)

reconociendo como punto di salida

· nos reglanan legal pa partidonan politico (Lv. Politieke Partijen – AB 2001 no.96)

y

considerando a base di respet mutuo

· e necesidad di un campaña electoral limpi y di nivel halto;

· e necesidad pa garantiza oportunidadnan igual pa cada partido politico den proceso electoral;

· e necesidad pa evita actonan di violencia y destruccion na cualkier momento;

· e derechonan fundamental di libertad di opinion y expresion;

· e importancia di mantene nos norma y valornan;

· e importancia pa atene na stipulacionnan di articulo 132 di nos Codigo Penal cu ta prohibi cumpramento di voto dor di partidonan politico;

· e necesidad di prohibi te cu 100 meter pafor di e urna electoral pa molestia e votador y toca musica duro pa influencia e votador o vocifera mensahenan partidario via equipo di sonido ariba dia di eleccion;

· e importancia pa prohibi actonan cu e meta pa stroba miembronan di partido politico pa funciona, pa trese e proceso electoral na peliger y pa destabiliza nos pais.

ta combini pa conhuntamente stipula, acepta, vigila y cumpli cu reglanan pa e proceso di campaña electoral.

E reglanan ta lo siguiente:

1. PARTIDONAN POLITICO (incluyendo nan dirigentenan, seguidornan, campañadornan y otro voluntarionan) lo abstene di:

a. acepta donacionnan (placa y material) di fuentenan liga na actividadnan criminal/ilicito y/o cu ta mara na un contraprestacion.

b. uso di fondonan publico, propiedad, material, equipo y recursonan humano (incluso “ter beschikkingstelling”) di gobierno, companianan estatal y/o institutonan publico pa metanan politico.

c. nombracion y promocion di personal den servicio di gobierno, companianan estatal y/o institutonan publico cu metanan politico;

d. uso di publicacion di documentonan y informacion confidencial di persona o empresa pa metanan di difamacion, sea anonimo o no.

e. uso di vocabulario cu contenido instigante, insultativo o calumnioso, irespecto cual medio di comunicacion;

f. maluso di declaracion di tercera persona incluyendo mucha o difunto den spotnan comercial politico (voz y imagen);

g. ponemento y uso di bandera, borchi y stickers o cualquier otro material di propaganda politico den cualquier forma riba:

§ palonan di luz, borchinan di trafico y otro propiedadnan publico y urnanan electoral;

§ propiedadnan priva sin permiso.

Na momento cu e convenio aki bay na vigor PARTIDONAN POLITICO ta compromete nan mes pa kita e materialnan di propaganda cu ta poni caba.

2. PARTIDONAN POLITICO lo enfoca riba e programa di nan partido politico pa e siguiente periodo di gobernacion (conforme stipulacionnan statutario di e partido politico), dunando un posicion claro y di principio ariba asuntonan importante den nos comunidad awendia. Den caso cu e programa ta inclui proyecto(nan) e partidonan politico lo trata di ilustra su beneficio(nan), costo y metodo di financiamento.

3. COMISION y PARTIDONAN POLITICO lo instala conhuntamente un Cuerpo di Supervision encarga cu e tarea di supervisa y di raporta na COMISION.

E CUERPO DI SUPERVISION lo mester consisti di

· un representante di cada partido politico firmante di e protocol aki;

· un representante for di grupo di dunador di trabao;

· un representante for di grupo di trahador;

· un representante di clero;

· un representante di enseñanza y

· un miembro apunta a “titre personnel” cu ta fungi como “liaison’ cu prensa.

4. En caso PARTIDONAN POLITICO viola, durante e proceso electoral, e reglanan stipula den e convenio voluntario aki, COMISION DI BON BOLUNTAD tin e tarea di sancion y lo tuma accion pa medio di

§ denuncia publicamente violacionnan di e convenio voluntario y

§ den caso di actonan castigabel pa ley hasi denuncia na instancianan competente.

5. PARTIDONAN POLITICO ta declara di ta contra pa permiti cu Gobierno - bao di un status di gabinete demisionario of no - ta:

· nombra y “bevorder” personal den servicio di gobierno, companianan estatal y/o institutonan publico cu metanan politico;

· usa fondonan publico, propiedad, material, equipo y recursonan humano (incluso “ter beschikkingstelling”) di gobierno, companianan estatal y/o institutonan publico pa metanan politico.

6. Despues di e proceso electoral un evaluacion lo tuma lugar. Cu tal objectivo

a. COMISION lo reuni dentro di 14 dia despues di dia di eleccion pa evalua e proceso electoral. COMISION lo publica su evaluacion.

b. PARTIDONAN POLITICO ta entrega na COMISION dentro di 90 dia despues di eleccion un relato financiero di e periodo di campaña conforme reglanan/normanan basico di contabilidad. COMISION lo evalua e calidad di e relato financiero y lo publica e resultado di esaki. En caso di no cumplimento cu e entrega COMISION lo denuncia esaki den prensa.

7. PARTIDONAN POLITICO ta compromete, si acaso nan drenta Parlamento despues di eleccion, cu lo prepara y ratifica tan pronto cu ta posibel un ley cu, por lo menos, ta stipula

· reglanan pa campaña electoral,

· reglanan pa contribucionnan financiero pa partidonan politico y entrega di un relato financiero di e periodo di campaña;

· cu ora un persona asumi puesto di ministro o parlamentario mester duna notario un lista di propiedadnan pa comparacion na final di gobernacion.

Aruba, 22 di juli 2005

COMISION BON BOLUNTAD PARTIDONAN POLITICO

Firmantenan di e convenio voluntario pa eleccion di 23 di september 2005

COMISION BON BOLUNTAD

PARTIDONAN POLITICO:

ALIANSA DEMOCRATICO ARUBANO (ALIANSA)

ARUBAANSE VOLKSPARTIJ/CHRISTENDEMOCRATEN ARUBA (AVP)

MOVIMIENTO PATRIOTICO DI ARUBA (MPA)

MOVIMENTO SOCIALISTA DI ARUBA (MSA)

ORGANISACION LIBERAL ARUBANO (OLA)

PARTIDO DEMOCRACIA REAL (Democracia Real)

PLATAFORMA POLITICO DI TRAHADOR (PPT)

RED DEMOCRATICO (RED)

SUMMUM BONUM

Aruba, 22 di juli 2005