PRIORIDADNAN PA GOBERNACION 2001-2005
Manifiesto di Comercio y
Industria Arubano den
cuadro di formulacion di
puntonan di salida pa un
programa di gobernacion pa e
periodo 2001-2005.
Dia 3 di
oktober ultimo Gobernador di Aruba a nombra Sr. Fredis J. Refunjol
Durante un presentacion dia 28 di augustus ultimo na
Seaport Conference Center Camara di Comercio e Industria (KvK)[1] a duna su punto di vista tocante e prioridadnan pa e
periodo di gobernacion nobo na e partidonan politico cu a participa na e
eleccion. E puntonan cu a haña atencion primordial durante e presentacion
tabata ta (a) capacidad di carga di nos isla, (b)structura y crecemento di
sector comercial, (c) futuro diversificacion economico, (d) desaroyo di
e-commerce y e sector di telecomunicacion y (e) finanzas publico.
Cu e manifiesto aki KvK ta elabora riba e puntonan aki y
ta presenta nan – unda esaki ta aplicabel – di acuerdo cu nan relacion cu e
puntonan di salida y prioridad estableci den e “opdracht” di e Formador. Siguientemente nos lo elabora
riba e puntonan aki y presenta nan – unda esaki ta aplicabel - di acuerdo cu
nan relacion cu e puntonan di salida y prioridad estableci den e “opdracht” di
e Formador.
Inicio
di un periodo di gobernacion nobo mester por ta base pa (re)formula un vision
pa nos pais. KvK ta opina cu tal vision mester ta total, bon integrá y coordiná den tur su aspectonan. Fihamento di
un vision pa e futuro direccion di nos pais, pueblo, finanzas, economia etc. ta
prome cu tur cos. Igual cu e solucionnan pa e
issues y retonan di corto y mediano plazo, e maneho di e gobierno nobo den su
diferente ministerionan mester ta deriva di e vision a largo plazo y mester ta consistente cu su obhetivo.
Pa por
fiha un vision total y realistico pa futuro mester tene cuenta cu e capacidad
di carga di nos pais. Un definicion di capacidad di carga ta: “The size of a
population that can live indefinitely in an environment without causing
irreparable damage to that environment”. Beneficionan di e enfoke aki ta cu e
ta (a) establece un direccion defini, (b) identifica areanan cu rekeri
atencion, (c) crea crecemento manehá, (d) conduci na manehonan coherente dentro
di un gobierno y entre gobiernonan sucesivo.
Un
capacidad di carga bon defini ta permiti nos pa defini nos metanan. E manehonan
di gobierno mester ta un funcion deriva di e capacidad di carga, cu e obhetivo
di logra metanan specifico. Pues e ta un instrumento pa prioriza metanan di un
manera obhetivo. Aunke capacidad di carga ta ensera sostenibilidad di desaroyo,
e ultimo aki ta limita su mes na e metodo pa logra algo sin necesariamente tene
cuenta cu e obhetivo final.
E
desaroyonan demografico actual (p.e. densidad di populacion, influho di
stranhero, envehecimento di populacion, scarsedad di tereno) ta hasi necesario
pa cada cuidadano participa y defini e parametronan di e futuro desaroyo di nos
isla. Por ehempel e plan aki lo delinea e direccion pa diversificacion di nos
actividadnan economico cu awor ta mas urgente cu nunca.
Relaciona cu esaki KvK ta
propone pa gobierno en colaboracion cu sector priva organiza un foro nacional
riba “planeamento di e capacidad di carga’ riba e fechanan 20, 21 y 22 di
februari 2002 bao di e lema ”unificacion dor di un meta comun”. E fechanan aki
ta determina teniendo cuenta cu e lo mester tuma lugar mas pronto cu ta
posibel, pero tambe realistico en vista di formacion di gobierno nobo, dianan
di fiesta y carnaval venidero.
Cu referencia na e
observacionnan di Banco Central di Aruba (CBA) pa considera pa “flexibiliza” e
moratorio vigente riba sector hotelero, KvK ta kere e maneho aki lo mester ta un resultado di e vision di nos
capacidad di carga. Tur cos cu nos hasi o laga di hasi mester ta decisionnan
consciente y hustifica a base di e vision pa un capacidad di carga.
Mirando e necesidad pa
formula un vision riba e capacidad di carga di nos isla, KvK a tuma e
initiativa pa bin cu un estudio profundo di e mercado arubano pa identifica
tanto e actividadnan economico cu ta di mas, di menos o sea ta falta por
completo. Na su tiempo nos lo presenta e resultadonan di e estudio costoso aki
na gobierno. Den cuadro aki nos ta remarca cu en general tin un falta di
material estadistica cu ta sumamente necesario pa tin un base pa planeamento y
formulacion di maneho.
“Saneamento di
finanzas publico pa medio di adaptacionnan structural dirigi riba reduccion di
e deficit financiero. Esaki ta exigi cu mester hiba un disciplina
presupuestario estricto cu mester conduci na un balanza sano di e presupuesto
pa e proximo periodo di gobernacion. Akinan mas cu claro mester tuma
KvK ta mira
Algun
instrumentonan/pasonan pa realiza esaki ta:
a.
institui di inmediato di un “personeelsstop” real;
b. “afvloeiing” natural;
c. limita structuralmente e uso di coordinatornan ministerial
Den cuadro di esaki nos ta propone pa duna e comision consehero di gobierno
riba tereno di asuntonan di personal e encargo pa duna conseho riba (i) e
cantidad maximo di coordinadornan rekeri pa ministerio y (ii) pa fiha un
presupuesto pa e post aki.
d.
regula formalmente y documenta e cantidad di consultants,
arbeidscontractanten y advisornan y nan nivel di salario pa evita excesonan;
e.
revisa conforme e recomendacionnan di Comision Fowler e posicion huridico
di gobernante y parlamentario, en particular e beneficionan secundario.
f.
adkeri (cumpra o construi) edificionan pa oficina en vez di huur tal
edificionan y pa centraliza mas tanto cu ta posibel e departamentonan
gubernamental (pa asina reduci gastonan
di transporte, comunicacion y acomodacion);
g.
ceramento di “hulpkantoren” (como akinan principalmente pagonan ta tuma
lugar por jega na un areglo cu banconan pa e pagonan aki corre via nan)
h.
elimina, transferi pa otro parti o “outsource” trabaonan
superfluo/innecesario manera venta di stampia,
motorrijtuigenbelasting (re-aloca bao di accijnzen riba gasolin),
keurmento di auto (via garashinan priva estilo hulandes) y distribucion di
formulario pa rijbewijs (via oficina di dokter di cas);
i.
sincroniza e periodo di valides di permisonan di trabao cu e duracion di e
empleo o sea amplia e periodo di valides pa maximalmente 3 aña y aumenta
simultaneamente e tarifa(nan) pa permisonan di trabao. Den cuadro aki, unavez
cu e proceso di tramita permiso ta optimal, nos ta apela pa activa e ley pa
duna “boet” na dunador di trabao cu ta emplea trahadornan ilegal.
Pa conclui nos ta remarca cu e reglanan stipula den e Ordenanza di Contablidad
ta hopi cla. E practica sinembargo ta
exigi disciplina incansabel y un actitud recto di tur esnan involvi.
Turismo
“Jega na
solucionnan riba terminonan corto y largo pa e situacion di crisis di turismo
ta pasando aden, debi na e reciente atakenan terrorista na Merca.
Mercadeo turistico ta rekeri – tanto durante como
fuera di un situacion di crisis – un actuacion flexibel, eficaz y eficiente. Direccion
di Turismo cu ta encarga cu e promocion di Aruba como destinacion turistico
mester wordo depolitiza y flexibiliza mas tanto cu ta posibel. KvK – den
coalicion cu e otro gremionan comercial y sindical – ta urgi pa completa cu
mayor brevedad implementacion di e recomendacionnan di rapport “ATA Nieuwe
Stijl”.
En general nos ta boga pa elabora un strategia di
desaroyo y di promocion pa nos producto turistico cu ta dirigi primeramente
riba calidad en vez di cantidad. Pa mantene y mihora e nivel di bida actual
servicionan turistico mester di mas contenido cu ta “value added”.
Bienestar
Economico y General
Progreso no
ta un resultado di su mes, progreso ta producto di nos labor y pa cual comercio
tin un papel clave. Como indudablemente progreso ta di vital importancia pa nos
isla, KvK kier mira un plan integral pa sostene e progreso aki den un forma
duradero y sostenibel.
Como puntonan di salida pa un maneho integral riba tereno di desaroyo
economico KvK kier trece dilanti:
-
maneho
pa establecimento di negoshi
Revision y modernizacion di e ley di establecimento di
negoshi (Vestigingsverordening Bedrijven) ta imperativo riba corto plazo. Banda
di esaki mester traha na stimula y hisa e calidad di nos empresanan chikito y
mediano. Den cuadro di esaki gobierno por hasi mas y mihor uzo di AMTI, un
fundacion crea y subsidia pa gobierno mes. KvK ta hasi un apelacion na gobierno
pa bin cu programanan di incentivo pa stimula establecimento y crecemento di
tal empresanan, pa aplica tecnologianan di operacion moderno y pa explora
mercadonan nobo pa exportacion. Lo mester haci un estudio di otro leynan cu ta
toca actividadnan economico, manera Vergunningsverordening, Landsverordening
Personenvervoer, si nan stipulacionnan y condicionnan ta cuadra cu e situacion
economico actual.
-
maneho
pa stimula desaroyo regional (San Nicolas y becindario)
-
desaroyo
di zona liber (industrial)
Nos lo kier mira specificamente implementacion di e
proyecto di modernizacion di zona liber y ehecucion di e rapport di e comision
mixto.
-
desaroyo
di nos ”financial offshore sector”;
-
diversificacion
di nos economia mester haya su “undivided” atencion y KvK pa e motivo ta
propone pa pone un alto funcionario full time responsabel y ocupa su mes cu e
meta aki.
Seguridad
Social
“Percura pa un
sistema di seguridad social cu ta duradero y financieramente responsabel.”
E nivel y e ritmo di un maneho pa un reparticion husto
di entrada pa cada cuidadano mester cuadra cu realidad economico, unda capital,
labor y tecnologia lo mester worde adequadamente compensa.
Pa loke ta toca e maneho social KvK ta
opina cu no cada cuidadano sino cada cuidadano “den good standing” mester por
biba dignamente. Den cuadro di un bida mihor mester bin cu un proyecto
educativo pa descurasha sin berguenzeria manera esaki a evolua den otro
comunidad asina cu e cuido social a wordo amplia y mehora. Cada cuidadano
mester ta consciente cu su bienestar ta su responsabilidad individual y no esun
di e estado.
Riba
tereno social reforma di e siguiente beneficionan existente ta consehabel:
-
AOV/AWW
Reforma di e seguro di AOV/AWW ta inevitable pa por
garantiza su continuacion. KvK ta propone pa hisa den un forma gradual e edad
di pension na 65 aña.
-
modernizacion di nos leynan
laboral
KvK ta propone pa actualiza nos leynan laboral segun
exigencianan di nos tempo. P.e. introduci sistemanan pa flexibiliza horarionan
di trabao, adapta nos sistema di retiro (Landsverordening Beeindiging
Arbeidsovereenkomsten) segun proposicion di ley di Sr. H. Lopez y elimina di e
ley di contratonan di corto duracion (Landsverordening Kortlopende
Overeenkomsten).
-
minimum lonen
Ta recomendabel pa sigi e mecanismo di ahuste anual conforme e consehonan di Sociaal Economische Raad (SER).
- adapta e beneficio di onderstand (no na e nivel di mimimum loon sino na e necesidadnan basico di bida (“bestaansminimum”)
-
Algemene Ziektekosten
Verzekering (AZV)
Sector priva kier mira
cu e protocol firma dia 15 di december 2000 titulá “Protocol regelende de
vernieuwing van de sociale verzekeringen” wordo ehecuta pa gobierno. Tambe mester pone hopi mas enfasis riba
control di gastonan y maluzo di e sistema di AZV.
Pa loke ta toca e
desaroyo den seguridad social Aruba ta move den direccion contrario cu otro
paisnan na mundo, esta direccion di regulacion en ves di privatisacion. Posicion
di KvK – y di comercio – semper tabata ta pro participacion di companianan di
aseguro priva den AZV dor di permiti mas “aanbieders” di e basispakket AZV. Tambe
lo mester duna consideracion na privatiza e Ziekteverzekering (loonderving)
segun e lineanan sigi pa Hulanda.
Pa loke ta
toca introduccion di un pension general suplementario pa trahadornan di sector
priva, un idea cu ta data for di basta aña,
nos mester atende riba e hecho cu e momento aki esaki no ta propicio
como e peso financiero pa e dunador ya ta mucho halto y gasto adicional no por
wordo carga. Nos ta re-itera cu sin progreso economico continuo ningun initiativa
riba tereno di beneficionan social no por ta sostenibel y duradero. Di otro
banda, nos lo kier mira su modalidad di implementacion den man di sector priva
y pues no ta exclui e posibilidad di e gremionan comercial en consulta cu e
gremionan sindical tuma e initiativa pa un proposicion.
Criminalidad
“Combatimento di
e ola di criminalidad cu ta sigui aumenta, caminda mester bin cu leynan nobo y
moderno y alavez trece solucionnan structural pa e problematica di choller y
drogadictonan cu ta anda rond den comunicadad.”
Ta reina un ambiente creciente di inseguridad den
comunidad y bao di empresarionan. KvK ta sostene e recomendacionnan di e
rapport “De Omslag” pa jega na un maneho integral pa combati y preveni criminalidad
den tur su formanan. Cu referencia na e recomendacionnan aki mester presenta cu
urgencia un plan di implementacion integral y aloca debidamente e fondonan
necesario pa realiza esaki.
Good
Governance
“Mester percura
pa bon gobernacion y integridad di gobernacion, esta “good governance” dirigi
riba ampliacion di transparencia, eficacia y efectividad di gobierno. Den
cuadro aki medio ambiente c.q. zonificacion merece atencion special durante e
proximo periodo di gobernacion. Mester hasi un Investigacionnan profundo y
reduci e aparato publico despues cu a hasi un analyse di su tareanan cardinal. Ta
recomenda pa deshasi o independiza e tareanan no cardinal na un manera
responsabel y en consulta cu e instancianan relevante y teniendo cuenta cu nos
leynan existente.”
KvK kier menciona cu ya caba tin un infrastructura
pa garantiza integridad y transparencia di gobernacion den nos leynan. E
problema di mehora e calidad di gobernacion no ta wordo adresa sin e
“commitment” y sentido di responsabilidad di nos politiconan. KvK lo kier mira
un cambio di actitud y kon ta bay impone e reglanan aki. En general mester bin
un maneho pa re-establece e normanan y valornan den comunidad cu ta den
degeneracion. Den esaki politiconan mester duna ehempel na comunidad.
Ademas ta recomenda pa fortifica e organonan di consulta
oficial a base di un plan di accion cu por worde implementa dentro di e promer
aña di gobernacion. Simultaneamente mester estrecha relacionnan cu tur e
“players” den nos comunidad – tanto tradicional como esun no tradicional, p.e.
gruponan ambiental – pa jega na un participacion real den un democracia bibo.
Entre gobierno y e partners social (esta organizacionnan di dunador di
trabao y sindical) nos ta propone pa cera un protocol cu ta regla e
modalidadnan di cooperacion y consulta
entre partidonan y cu lo keda aplicabel
durante henter e periodo di gobernacion. E protocol aki lo mester wordo firma
prome cu jega na cualquier convenio cu e gobierno nobo.
KvK ta sostene e idea pa un gobierno cu ta traha pa colectividad ta limita
su tareanan na loke realmente ta su razon di existencia. Nos ta urgi pa hasi un
estudio di e problema “kiko ta e interes publico y kon por reparti e tareanan
concerni entre sector publico y sector priva”. Un aparato gubernamental
moderno, flexibel, eficaz y ”client-friendly” lo duna impulsonan positivo pa
bienestar di nos comunidad.
Den cuadro di un bon
funcionamento nos ta considera imperativo pa analiza e division actual di
ministerionan. KvK ta favorece un restructuracion (no ampliacion) di
ministerionan solamente si e ta contribui na mas eficiencia y eficacia di
gobierno su funcionamento.
1.
Asuntonan Economico,
Comunicacion y Utilidades
2.
Turismo y Transporte
3.
Finanzas
4.
Asunto General (cu projectbureau
e-commerce)
5.
Salubridad Publico y Asuntonan
Social
6.
Ensenanza,
Labor, Asuntonan Cultural y Deporte
7.
Husticia
y Obras Publico, Medio Ambiente y Zonificacion
Encuanto e cantidad di ministerio KvK ta ripiti su
posicion cu esaki lo mester keda limita na shete (7). Mester percura pa
cualkier restructuracion di ministerionan wordo legaliza pa medio di cambio di
leynan concerni.
Nos ta remarca cu cualquer plan pa reorganisacion y restructuracion di nos aparato
gubernamental mester ta explicito pa asina percura cu su metanan ta cla y
realizabel.
Sector publico mester sigi e pasonan di e desaroyonan actual y global pa
evita cu su aparato bira inefectivo y ta efecta e progreso di nos isla.
En particular ta recomenda pa:
- stimula inversionnan di capital;
-
regresa
na e sistema bieu di ayudo di desaroyo anual di Hulanda. Si acaso esaki no ta posibel realiza cu e prioridad mas
halto e Fundacion Desaroyo Arubano (FDA)
Tambe nos ta sinti falta di atencion pa inversionnan
necesario relaciona cu mehoracion y mantencion di e infrastructura esencial pa
nos pais, manera nos carreteranan.
-
reforma e sistema fiscal general pa medio di ehecucion integral di e
rapport “Modernisering Inkomstenbronnen Overheid” di Comision Timmer (cu esaki
e sistema fiscal lo wordo simplifica, unda ta pone mas enfasis y mihor
supervision riba impuestonan cu ta representa e fuentenan di entrada mayor
(p.e. accijns riba gasolin y derechonan di importacion);
-
stimula
penetracion di comercio electronico (e-business/e-government)
Mundialmente aplicacion di tecnologianan di informacion y
comunicacion ta e trend dominante. Na augustus 2000 e platform nacional
“E-steering Committee” a presenta na gobierno su rapport final conteniendo 26
recomendacion riba tereno bancario, legislativo, fiscal, logistico, educativo y
organisatorio (un di e recomendacionnan di e comision aki ta pa apunta un
funcionario pa ehecuta y coordina actividadnan di e-commerce/e-government, aki
nos ta referi na nos recomendacion pa institui un projectbureau e-commerce).
-
Direccion di Trabao mester sumistra Directie Openbare Orde en Veiligheid
(DOOV) regularmente cu un lista corriente di e funcionnan pa cual por califica
pa un permiso di trabao.
-
inverti den e equiponan necesario pa sorteer post y introduci un sistema di
postcode pa asina optimaliza e servicionan postal y pa por mantene un posicion
competitivo frente e servicionan di entrega priva.
Ademas mas
atencion ta rekeri pa e siguiente issues, cual ya pa varios ana ta pendiente y cu
merece un tratamento cu mayor prioridad:
-
independizacion/privatizacion di departamentonan gobernamental (p.e. Aruba
Tourism Authority, Telecommunicatiebedrijf SETAR, Direccion Postal);
-
cuido di nos medio ambiente y regulacion di nos espacio
KvK ta sostene introduccion di e proyectonan di ley
presenta pa Departamento VROM, esta e Landsverordening Ruimtelijke Ordening y e
Landsverordening milieubeheer. y ta spera cu esakinan keda implementa dentro di
e prome aña di gobernacion.
- ensenanza
KvK ta mantene cu posicion encuanto di introduccion di ensenanza
obligatorio, esta introduccion di un “leerplicht” mester ta mara na cumplimento
cu algun garantia, e.o. alocacion di suficiente fondo, mantencion di e normanan
oficial di ensenanza. Ademas introduccion no mester bay a costo di e
proyectonan di renobacion di ensenanza, esta SHA en PRIEPEB.
Un re-evaluacion di e uzo di Papiamento como idioma di instruccion lo ta necesario en vista di posibel efectonan pa nos mercado laboral. Nos ta recomenda pa introduci Papiamento awor mesora como materia (vak).
- Cuido medico
KvK ta re-itera e
posicion di gremionan comercial cu un di dos hospital no ta consehabel na e
momento aki. Pa mehora
calidad di nos cuido medico nos ta propone pa optimaliza Dr. H. Oduber Hospital
(e.o. pa medio di ampliacion) y tambe e servicionan medico disponibel na San
Nicolas, en particular fortifica e facilidadnan di “Eerste Hulp” e.o. dor di
crea un post pa ambulans y upgrade e servicionan actual.
Aruba, 11 di oktober 2001
[1] Conforme articulo 1 inciso di
Landsverordening op de Kamer van Koophandel en Nijverheid (AB 1990 no. GT29)
comercio y industria na Aruba ta wordo representa pa Camara di Comercio y
Industria.